Este roteiro adicado ao primeiro bispo coñecido de Britonia atravesa parte do Concello da Pastoriza. O percorrido ten unha lonxitude de 14,3 km (aproximadamente 3 horas e media) e comeza e remata no paseo fluvial de Bretoña, no Coto da Auruxeira, onde cada agosto desde 1996 se celebra a festa celta do Lugnasad. O primeiro quilómetro e medio transcorre a través das fragas que bordean Bretoña polo Oeste, á beira do río Miñotelo, onde se poden ver varios muíños de auga tradicionais, para logo ascender ata Pena Gallada, no alto do Monte Carracedo, nunha contorna salpicada polos inmensos muíños de vento modernos. O camiño chega tamén ao Campo do Oso, onde cada xuño ten lugar a famosa Rapa das Bestas da rexión, por iso non estraña atoparse mandas de cabalos movéndose libremente por estes cumios. Nun día despexado, desde o alto da Pena Gallada aprécianse no Leste as terras de Navia colindantes con Asturias, mentres que no horizonte norteño pode verse o mar cantábrico da ría de Foz, onde quizáis desembarcaron os bretóns comandados por Maeloc a mediados do século VI, antes de penetrar 30 km a través de territorio suevo ata chegar ao castro que subxace baixo a actual Santa María de Bretoña.
Máis información:
- Wikiloc | Ruta Ruta Maeloc Bretoña
- Wikiloc | Ruta Ruta de Maeloc (Bretoña-A Pastoriza)
- Rutas de senderismo na Terra Chá (terrachanaturalmente.org)
- Noticia da inauguración: https://www.elprogreso.es/articulo/a-chaira/pastoriza-estrea-duas-rutas-sendeirismo-rigueira-bretona/202010081544021463575.html.
Galego 
Español